Bloomberg-ის ცნობით, Apple ჭკვიანი სახლის კამერას ამზადებს, რომელიც ვიდეოს არ ჩაიწერს

Bloomberg-ის ჟურნალისტის, მარკ გურმანის, ცნობით, Apple ჭკვიანი სახლის უსაფრთხოების კამერაზე მუშაობს, რომელიც ვიდეოს არ ჩაიწერს. მოწყობილობა ვიდეოჩანაწერის ნაცვლად AI-ს გამოიყენებს სახლში მოძრაობის გასაანალიზებლად. ამის შესახებ Engadget-ი წერს.

გურმანის პროგნოზით, Apple-ის დიდი ხნის ნანატრი ჭკვიანი სახლის ჰაბი ოქტომბრის ბოლოს შეიძლება გამოვიდეს, კამერა კი მოგვიანებით გამოჩნდება. მანვე აღნიშნა, რომ კომპანია HomePod mini-სა და Apple TV-ის უფრო მძლავრ ვერსიებსაც გამოუშვებს, რომლებსაც ახალი Siri AI ეკოსისტემის მხარდაჭერა ექნებათ.

კამერა ვიდეოს არ იწერს

კამერა Apple-ის ჯერ გამოუცხადებელი ჭკვიანი სახლის დისპლეის თანმხლები პროდუქტია, რომელსაც კომპანია შიდა კოდური სახელით J490 მოიხსენიებს. გურმანის თქმით, პატარა ცილინდრული კამერები სახლის სხვადასხვა ადგილას დამონტაჟდება და ტუჩსაცხს წააგავს. მათი კადრების სიხშირე ძალიან დაბალი იქნება, ვიდეოჩაწერის ფუნქცია კი საერთოდ არ ექნებათ.

როგორ მუშაობს

მოძრავი სურათების ჩაწერის ნაცვლად სენსორი AI-ს გამოყენებით აანალიზებს სახლში მოძრაობას. შესაძლებელი იქნება სახის ამოცნობაც: თუ კამერა ოთახში შემოსულ ადამიანს ამოიცნობს, მომხმარებელს შეტყობინება მიუვა იმის შესახებ, ნაცნობია თუ არა შემოსული ადამიანი, თუმცა მხოლოდ ტექსტური აღწერილობის სახით. ჯერჯერობით უცნობია, შესაძლებელი იქნება თუ არა მოწყობილობიდან ცალკეული უძრავი კადრის ამოღება.

რატომ არის მნიშვნელოვანი

როგორც გურმანი აღნიშნავს, ვიდეომასალის სრული არარსებობა პოლიციას სახლში შეჭრის შემთხვევაში ნაკლებად დაეხმარება, თუმცა კონფიდენციალურობის დამატებითი დონე Apple-ის კამერას გაჯერებულ ბაზარზე გამორჩეულს გახდის. Engadget-ის შეფასებით, კომპანია ითვალისწინებს მომხმარებლების მზარდ შეშფოთებას ზედმეტი თვალთვალისა და მონაცემების ბედის გამო.

გურმანის თქმით, კამერა იმავე ტიპის ტექნოლოგიას გამოიყენებს, რასაც კამერიანი AirPods, რომლის დეტალებიც ზაფხულში გავრცელდა. macOS Tahoe 26.7-ის ადრეულ ვერსიაში ნაპოვნი კოდის მიხედვით, ყოველ AirPod-ს საკუთარი პატარა ჩაშენებული კამერა ექნება, რომელიც უკიდურესად დაბალი გარჩევადობის RGB უძრავ კადრებს იღებს Visual Intelligence-ით ანალიზისთვის. Meta-ს კამერიანი სათვალეების გარშემო არსებული კრიტიკის შემდეგ, Apple-ის AirPods-ს, ცნობების მიხედვით, ფოტოს გადაღება და ვიდეოს ჩაწერა არ შეეძლება.