NBER-ის კვლევის მიხედვით, მსოფლიო ბანკის დახმარების 2-6% კრიპტოვალუტაში გადაირიცხა

ეროვნული ეკონომიკური კვლევის ბიუროს (NBER) ახალი სამუშაო ნაშრომის მიხედვით, მსოფლიო ბანკის დახმარების ყოველი დოლარიდან 2-6 ცენტი კრიპტოვალუტის საფულეებში გადაირიცხა. მკვლევრების შეფასებით, ეს 1,7-4,4 მილიარდ დოლარს შეადგენს. ნაშრომი „Crypto Capture of Foreign Aid“ 2026 წლის აგვისტოში გამოქვეყნდა. მისი ავტორები არიან სუმიტ აგარვალი, პეიი ძინი, ესვარ ს. პრასადი და დანიელ რაბეტი.

კვლევა 2018-2024 წლებში 93 მიმღებ ქვეყანაში გაცემულ დახმარებას მოიცავს, რომლის მთლიანი მოცულობა 238 მილიარდი დოლარია. მკვლევრებმა გააანალიზეს, როგორ იცვლებოდა კრიპტოვალუტით აქტივობა ტრანშების ჩარიცხვის თვეებში.

ნახტომები ჩარიცხვის თვეებში

შედეგები აჩვენებს, რომ ტრანშის ჩარიცხვის თვეში კრიპტოვალუტით აქტივობა მკვეთრად და ხანმოკლედ იზრდებოდა. ნახტომები ძირითადად ანონიმურ და ახლად შექმნილ საფულეებზე მოდიოდა, როგორც ოფშორულ, ისე ჩვეულებრივ კრიპტობირჟებზე. ბლოკჩეინის ანალიზმა ფულის გათეთრების სამი კლასიკური ეტაპისთვის დამახასიათებელი ნიმუშები გამოავლინა: განთავსება, ფენებად დაყოფა და ინტეგრაცია.

ნაშრომი პასუხობს კითხვას, გადავიდა თუ არა განვითარებად ქვეყნებში დახმარების გაჟონვა კრიპტოვალუტაზე მას შემდეგ, რაც 2016 წელს „პანამის დოკუმენტების“ გაჟონვამ ოფშორული ბანკინგისა და ფულის გათეთრების კონტროლი გაამკაცრა.

ბლოკჩეინის ფორენსიკა და ვებტრაფიკი

ამისთვის ავტორებმა დახმარების გადახდის თარიღებზე მიბმული ფორენსიკული მეთოდი შეიმუშავეს. ის ბლოკჩეინზე დაფიქსირებულ Bitcoin-ის ტრანზაქციებსა და ახლად შექმნილ საფულეებს, კრიპტობირჟების ჩანაწერებსა და IP-ზე მიბმულ ვებტრაფიკს აერთიანებს. მეთოდი ტრანშის ჩარიცხვის ადმინისტრაციულ ვადებს ეყრდნობა და სწორედ ამ თვეებს უკავშირებს კრიპტოაქტივობის ნახტომებს.

გაჟონვა დაფინანსებას არ ამცირებს

მკვლევრებმა გაჟონვა ოთხ სექტორში დააფიქსირეს: ტრანსპორტი, წყალმომარაგება და სანიტარია, სოციალური დაცვა და მმართველობა. ამ სექტორებს მსოფლიო ბანკის შემდგომი დაფინანსების ნახევარი მაინც ერგება, ანუ გაჟონვას დაფინანსების შემცირება არ მოჰყოლია.

ავტორების დასკვნით, კრიპტოვალუტას ორმაგი როლი აქვს: ის დახმარების გაჟონვას აადვილებს, თუმცა გამჭვირვალე ბლოკჩეინ-ჩანაწერები ფორენსიკულ კვალს ტოვებს, რაც გაჟონილი თანხების გამოვლენასა და დაბრუნებას შეიძლება დაეხმაროს.