Mozilla-მ Firefox-ის ახალი დიზაინი გამოუშვა 157-ე ვერსიასთან ერთად

Mozilla-მ Firefox-ის განახლებული დიზაინი ყველა მომხმარებლისთვის გამოუშვა. კომპანიის თქმით, ახალი იერი 157-ე ვერსიასთან ერთად მოვიდა როგორც კომპიუტერზე, ისე მობილურ მოწყობილობებზე, Nightly-ში რამდენიმეთვიანი ტესტირების შემდეგ, სადაც მომხმარებლები დიზაინს ადრე ცდიდნენ და თავიანთ შენიშვნებს უზიარებდნენ.

უფრო თანამედროვე Firefox

Mozilla-ს აღწერით, ახალი დიზაინი „თანამედროვეა, მაგრამ არა უპიროვნო. თბილია, თუმცა მაინც ზუსტი“. ბრაუზერში განახლდა ფერები, ხატულები და თემები: ჩანართები, ხელსაწყოების ზოლი, ახალი ჩანართის გვერდი და კონფიდენციალური დათვალიერება. კომპანია ამბობს, რომ ამ ცვლილებებს ბრაუზერის მუშაობის სიჩქარეზე გავლენა არ აქვს.

იგივე დიზაინის ენა ახლა კომპიუტერსა და მობილურ მოწყობილობებზე ერთნაირად მუშაობს. Mozilla-ს თქმით, ეს ბრაუზერს მომავალი ფუნქციებისთვის ერთიან საფუძველს აძლევს და მის გამორჩეულ ხასიათს ინარჩუნებს.

Firefox უფრო მეტად შენზე მორგებული

დაბრუნდა Compact Mode, რომელსაც ბევრი მომხმარებელი ითხოვდა. ის ამცირებს ჩანართებისა და ხელსაწყოების ზოლის ზომას, რომ გვერდს მეტი ადგილი დარჩეს. პატარა ეკრანებისთვის ცალკე Auto-Compact პარამეტრია გათვალისწინებული. დაემატა თემების ამრჩევი ახალი თემებითა და ფონებით, ახალი ჩანართის გვერდზე კი ხშირად გამოყენებული საიტის მიმაგრება შეიძლება, რომ ის ყოველთვის თვალწინ იყოს.

დახვეწა და არა ხელახლა შექმნა

Mozilla-ს თქმით, პრინციპები, რის გამოც ადამიანები Firefox-ს ირჩევენ, უცვლელია. ბრაუზერი კვლავ დამოუკიდებელი და ღია კოდის პროექტია, კონფიდენციალურობის დაცვა მასში ჩაშენებულია, ხოლო მომხმარებელი თავად წყვეტს, როგორ იმუშაოს ბრაუზერმა, ხელსაწყოების ზოლის სიმაღლიდან დაწყებული, რომელი AI ფუნქციები გამოჩნდეს, რომელი მოდელი გამოიყენოს და რა კონტექსტი მისცეს მას.

წლის განმავლობაში Firefox-ს დაემატა ორი გვერდის გვერდიგვერდ დათვალიერება, ჩაშენებული VPN, ტრეკერების დაბლოკვა და პარამეტრები იმისთვის, თუ როგორ გამოჩნდეს AI ბრაუზერში.