Claude Code-ում auto mode-ը դարձավ լռելյայն ռեժիմ

Ինչ է փոխվում օգոստոսի 14-ից

Anthropic-ը Claude Code-ում ավտոմատ ռեժիմը դարձրեց լռելյայն։ Օգոստոսի 14-ից Pro, Max և Team պլանների նոր սեսիաները կմեկնարկեն այդ ռեժիմով. ովքեր արդեն ամրագրել են այլ լռելյայն, կպահեն այն, իսկ մյուսներին կարող է մեկանգամյա հարց տրվել անցման մասին։ Դասակարգիչը յուրաքանչյուր գործիքային կանչի համար ծախսում է փոքր թվով լրացուցիչ թոքեն, և ընկերությունն այդ ծախսը այլևս չի գանձում այս պլանների օգտատերերից։

Claude Enterprise-ում, Claude API-ում, AWS-ի Claude Platform-ում, Amazon Bedrock-ում, Google Cloud-ի Agent Platform-ում և Microsoft Foundry-ում ռեժիմը դեռ միացվում է ձեռքով, որպեսզի ադմինիստրատորները գնահատեն փոփոխությունը։ Ընկերությունը մոտ մեկ ամսում ամպային գործընկերների հետ ծրագրում է այն լռելյայն դարձնել նաև այնտեղ. Enterprise-ի ադմինիստրատորներն արդեն կարող են միացնել այն managed settings-ով։

Ինչպես է աշխատում

Թույլտվություն խնդրելու փոխարեն ավտոմատ ռեժիմը յուրաքանչյուր կանչ անցկացնում է դասակարգչի միջով, որը բլոկում է անշրջելի, կործանարար կամ օգտատիրոջ միջավայրից դուրս ուղղված գործողությունները։ Բլոկման դեպքում Claude-ը սովորաբար գտնում է ավելի անվտանգ ուղի կամ հարցնում է օգտատիրոջը. եթե առաջընթաց չկա՝ երեք բլոկ անընդմեջ կամ քսան՝ սեսիայի ընթացքում, համակարգը վերադառնում է ձեռքով հաստատումներին։

Հիմնավորումը հետևյալն է՝ ձեռքով ստուգումը դառնում է սովորություն։ Claude Code-ում օգտատերերը հաստատում են թույլտվության հարցումների 97%-ը, մինչդեռ մերժում են իրենց ներկայացված պլանների 39%-ը։

Անվտանգության տվյալները

Anthropic-ը հղում է ներքին և արտաքին ռեդ-թիմինգի, prompt injection-ի գնահատումների, 1 053 վճարովի թեստավորողով վերահսկվող ուսումնասիրության և իրական սեսիաների վերլուծությանը՝ պնդելով, որ ավտոմատ ռեժիմը բոլոր ցուցանիշներով հավասար կամ ավելի լավ արդյունք է տվել, քան ձեռքով ստուգումը։ Մի թեստում մարդիկ ակնհայտ վտանգավոր հրահանգը նկատեցին ընդամենը 13,6% դեպքերում (143-ը՝ 1 053-ից), իսկ ավտոմատ ռեժիմը բլոկեց դրանց 89%-ը։ Սեսիայի երկարացման հետ մարդկանց ցուցանիշը իջավ մինչև մոտ 5%, իսկ ավտոմատ ռեժիմինը մնաց կայուն։

Բրիտանական Apollo Research անվտանգության ստարտափի հետ երկշաբաթյա փորձարկումից հետո սինթետիկ հարձակումներին դիմակայելու համար ուժեղացված դասակարգիչը բռնեց նախկինում բաց թողնված հարձակումների մոտ կեսը, իսկ բաց թողնելու ցուցանիշը 12%-ից իջավ 7%-ի։ Trajectory Labs-ի գնահատման մեջ 720 անուղղակի prompt injection փորձից ոչ մեկը չհաջողվեց Claude-ի մոդելների վրա ավտոմատ ռեժիմում, մինչդեռ Codex-ի Auto-review ռեժիմում հաջողվեց 5,83%-ը։

Արտադրության մեջ

Ընկերության տվյալներով՝ ավտոմատ ռեժիմն արդեն լռելյայն է նաև նրա ներքին Claude Code օգտագործման մեջ, որտեղ դասակարգիչը, օրինակ, կանխեց զեկույցի հրապարակումը հանրային կոդ-փոխանակման կայքում և շուրջ երկու հազար pod-երի զանգվածային անջատման փորձը, որը կոչնչացներ ընթացիկ ուսուցման աշխատանքները։ Հաճախորդներից ռեժիմն օգտագործում են Adobe-ը, Nuro-ն, Gusto-ն և Garner Health-ը, իսկ Teams և Enterprise հաճախորդների շրջանում ավտոմատ ռեժիմի օգտատերերը մոտ 25%-ով ավելի շատ pull request են ուղարկում։