Tower Semiconductor-ը 4 միլիարդ դոլարով Ճապոնիան կդարձնի օպտիկական չիպերի գլխավոր հաբ

Իսրայելական կիսահաղորդիչներ արտադրող Tower Semiconductor-ը պատրաստվում է Ճապոնիան դարձնել օպտիկական կապի չիպերի իր ամենամեծ արտադրական հաբը՝ որպես 4 միլիարդ դոլարի ծրագրված ներդրման մաս։ Այս մասին սեպտեմբերի 24-ին հրապարակված Nikkei-ի հարցազրույցում ասել է ընկերության գործադիր տնօրեն Ռասել Էլվանգերը։ Ընդլայնումը նպատակ ունի բավարարել AI սերվերների տեխնոլոգիաների աճող պահանջարկը. տվյալների կենտրոններում օպտիկական գծերը փոխարինում են պղնձե կապերին։

Երկու ուղղությամբ ընդլայնում

Tower Semiconductor-ը ծրագիրը հայտարարել էր հուլիսին։ Այն ներառում է երկու զուգահեռ ուղղություն՝ 300 մմ սիլիկոնային ֆոտոնիկա, սիլիկոն-գերմանիում (SiGe) և advanced packaging։ Առաջին ուղղության շրջանակում ընկերությունը Arai գործարանը, նախկին Fab 6-ը, վերազինելու է 300 մմ սիլիկոնային ֆոտոնիկայի արտադրության համար, ինչպես նաև առավելագույնի է հասցնելու Uozu-ում գտնվող իր 300 մմ Fab 7-ի արտադրությունը։

Արտադրության ամբողջական պատրաստվածությունը նախատեսված է 2027 թվականի չորրորդ եռամսյակում։ Երկրորդ ուղղությունը մեկնարկում է առաջինի հետ զուգահեռ. Tower-ը նախատեսում է Fab 7-ի կողքին կառուցել ևս մեկ 300 մմ արտադրական գործարան՝ համապատասխան պայմանագրերի ստորագրումից և կնքումից հետո։ Նոր գործարանը, ընկերության ակնկալիքով, մի քանի անգամ կավելացնի սիլիկոնային ֆոտոնիկայի և սիլիկոն-գերմանիումի հզորությունները։

Ծախսեր, դրամաշնորհներ և թիրախներ

Ծրագրի արժեքը մոտ 4 միլիարդ դոլար է, ներառյալ Ճապոնիայի կառավարության մոտ 1 միլիարդ դոլարի դրամաշնորհը՝ METI-ի (տնտեսության, առևտրի և արդյունաբերության նախարարություն) միջոցով։ Մնացած մոտ 3 միլիարդ դոլարը ֆինանսավորում է ինքը՝ Tower-ը։ Ըստ Reuters-ի՝ հուլիսյան հայտարարությունից հետո ընկերության բաժնետոմսերը ԱՄՆ-ի բորսայում աճել են ավելի քան 18%-ով նախնական սակարկություններում։

Առաջին փուլն ուղեկցվում է թարմացված բիզնես մոդելով. ընկերությունն այժմ 2028 թվականի համար թիրախավորում է 3,6 միլիարդ դոլար եկամուտ և 1,2 միլիարդ դոլար զուտ շահույթ՝ նախկին 2,8 միլիարդ դոլարի և 750 միլիոն դոլարի փոխարեն։

«Ակնկալում ենք, որ երկրորդ ուղղությունը 2028 թվականից շատ ավելի հեռու շարունակական աճի ուղի կապահովի», - ասել է Էլվանգերը ծրագրի հայտարարման ժամանակ։

Ինչու է դա կարևոր

Սիլիկոնային ֆոտոնիկան տվյալները փոխանցում է լույսով, ոչ թե էլեկտրական ազդանշաններով, և դառնում է կարևոր տեխնոլոգիա AI կլաստերների համար, քանի որ արագացուցիչների թիվն աճում է։ Tower-ի խոսքով՝ Ճապոնիայի հարթակները կբավարարեն AI-ի և տվյալների կենտրոնների հավելվածների օպտիկական կապի նոր սերնդի պահանջները։

Ընկերությունն արդեն ունի երեք արտադրական հարթակ Ճապոնիայում. դրանք TPSCo-ինն են, որտեղ Tower-ին մեծամասնական բաժին է պատկանում, և որը ստեղծվել է Panasonic-ի նախկին կիսահաղորդչային բիզնեսի հիման վրա։ Բացի այդ, ընկերությունն ունի գործարաններ Իսրայելում և ԱՄՆ-ում։