American Airlines-ის მექანიკოსი აზრიელ „ალ“ ბლეკმენი 100 წლის ასაკში გარდაიცვალა

American Airlines-ის მექანიკოსი აზრიელ „ალ“ ბლეკმენი, გინესის მსოფლიო რეკორდების წიგნის მფლობელი ავიაკომპანიის მექანიკოსის ყველაზე ხანგრძლივი კარიერის ნომინაციაში, 100 წლის ასაკში გარდაიცვალა.

80 წელზე მეტი ერთ ავიაკომპანიაში

Simple Flying-ის ცნობით, კომპანიისა და თვითმფრინავების ტექნიკური მომსახურების საზოგადოების მიერ სოციალურ ქსელებში გავრცელებული შეტყობინებებით, ბლეკმენი პარასკევს, 24 ივლისს, საღამოს გარდაიცვალა. მისი კარიერა 80 წელზე მეტს მოიცავდა და მთლიანად ერთ ავიაკომპანიას დაუკავშირდა — მან დაინახა, როგორ გადავიდა ინდუსტრია მფრინავი ნავებიდან თანამედროვე ორძრავიან ფართოკორპუსიან თვითმფრინავებზე.

„ეს ნამდვილი საავიაციო ლეგენდა იყო“ — ასე ეხმაურებოდა ავიაკომპანია მის გარდაცვალებას, ხაზს უსვამდა რა მის პროფესიონალიზმს, ერთგულებასა და მენტორობას, რომელმაც თაობები ჩამოაყალიბა. კომპანიის შეფასებით, მისი გავლენა ტექნიკურ მომსახურებას სცდებოდა და ის ისტორიაში ერთ-ერთ ყველაზე პატივსაცემ თანამშრომლად დარჩა.

1942 წელი: 50 ცენტი საათში და მფრინავი ნავები

ბლეკმენის გზა 1942 წლის 17 ივლისს დაიწყო, როცა 16 წლისამ American Export Airlines-ში — American Airlines-ის წინამორბედში — დაიწყო მუშაობა. მანჰეტენის საავიაციო სკოლის დამთავრებისთანავე სამსახურის მისაღებად დედის თანხმობა დასჭირდა და ლითონის საამქროში შეგირდად საათში 50 ცენტს გამოიმუშავებდა.

პირველი სამუშაო ადგილი ნიუ-იორკის LaGuardia-ს საზღვაო ტერმინალი იყო, სადაც Sikorsky-ს მფრინავ ნავებს ემსახურებოდა — ხანდახან Flushing Bay-ის წყალში შედიოდა, რომ ჰიდროთვითმფრინავები ჰანგარში შეყვანამდე დაემაგრებინა. ათწლეულების განმავლობაში მან კომპანიის თითქმის ყველა ტიპის თვითმფრინავზე იმუშავა, ბოლოს კი Boeing 777-ის ფლოტზე. ის Boeing-ის ბაზაზე ტექნიკური მომსახურების ბრიგადის უფროსად მუშაობდა ნიუ-იორკის ჯონ კენედის აეროპორტში და უმცროსი მექანიკოსებისთვის მენტორიც იყო.

777-200, რომელსაც მისი სახელი ატარებდა

2017 წელს, კომპანიაში მუშაობის 75 წლისთავზე, American Airlines-მა მისთვის Boeing 777-200 მიუძღვნა, რეგისტრაციის ნომრით N751AN, ხსოვნის დაფით, რომელზეც ავიაკომპანიის მექანიკოსის ისტორიაში ყველაზე გრძელი კარიერაა აღნიშნული. მექანიკოსებმა თვითმფრინავს „7BK“ შეარქვეს, ცერემონიას კი გინესის რეკორდების წარმომადგენლებიც დაესწრნენ, რომლებმაც რეკორდი ოფიციალურად დაადასტურეს. კომპანიამ მის პატივსაცემად აშშ-ის კაპიტოლიუმის დროშაც გამოაგზავნა.

ბლეკმენმა მუშაობა კიდევ ხუთი წელი გააგრძელა და 2022 წელს ავიაკომპანიაში 80 წელი აღნიშნა — შედეგი, რომელსაც კომერციული ავიაციის ისტორიაში იშვიათად თუ მოიძებნება ანალოგი.

„როცა საქმე მოგწონს, ეს სამუშაო აღარ არის“

მოგვიანებით წლებშიც კი ბლეკმენი ჩვეულ რუტინას ინარჩუნებდა: ოფიციალურად ცვლა დილის 5 საათზე იწყებოდა, ის კი ჰანგარში, როგორც წესი, 3 საათამდე ჩადიოდა. გარდაცვლილი მეუღლე დელორესი, Aviation Circle-ის ცნობით, ხუმრობდა, რომ უნდა „წასულიყო სამსახურში და მეგობრებთან ეთამაშა“. თავად ბლეკმენი თავის დამოკიდებულებას ავიაკომპანიის ვებგვერდზე ასე აღწერდა: „როცა საქმე მოგწონს, ეს სამუშაო აღარ არის“.