Capcom RE Engine-ს „AI თაობის თამაშის ძრავად“ ეტაპობრივად გადააქცევს

2 ოქტომბერს გამართულ საკუთარ ტექნოლოგიურ კონფერენციაზე Capcom-მა წარმოადგინა გეგმები შიდა RE Engine-ის განვითარების შესახებ. ღონისძიებას Capcom Open Conference RE: 2026 ერქვა, ყველაზე მნიშვნელოვანი კი პროგრამისტ სატოში იშიდას მოხსენება იყო, სათაურით „The Outlook and Future of the REX Project, Further Evolving the RE Engine for the Next Generation“.

რა სირთულეებს ხედავს Capcom

იშიდამ იმ სირთულეებზე ისაუბრა, რომლებსაც Resident Evil-ის მასშტაბის თამაშების შემქმნელი სტუდიები აწყდებიან: პროექტები იმდენად დიდია, რომ უმარტივეს ამოცანებსაც უკიდურესად დიდი დრო სჭირდება, თანამშრომლების რაოდენობის ზრდა კი ისეთ ძრავას მოითხოვს, რომელიც ყველასთვის ადვილად გამოსაყენებელი იქნება. გამოსავლად მან „AI ტექნოლოგიის წარმატებული ინტეგრაცია განვითარების სამუშაო პროცესებში“ დაასახელა და აღნიშნა, რომ ეს მომავალი განვითარების გამარტივების აუცილებელი პირობაა.

„AI თაობის თამაშის ძრავისკენ“ მიმავალი გზა

ეს ცვლილებები REX-ის სახელით ცნობილ მრავალეტაპიან პროგრამაში ერთიანდება. ის თამაშების შექმნის ეფექტიანობას, ძრავის წარმადობას, ხელსაწყოებსა და ხარისხის კონტროლს მოიცავს. Capcom-ის აზრით, ნულიდან ახალი ძრავის შექმნის ნაცვლად, გაუმჯობესებების ეტაპობრივად დამატებაა RE Engine-ის ახალ თაობამდე მიყვანის საუკეთესო გზა. REX-ის ნაწილს მაინც კომპანია ღია კოდად აქვეყნებს, AI-ის გაწვრთნის მიზნით. GameBiz-ის ცნობით, REX მთელ RE Engine-ს „მსოფლიოში ყველაზე გავრცელებულ პროგრამირების ენაზე“ აერთიანებს, რაც ძრავას როგორც ადამიანებისთვის, ისე AI-ისთვის უფრო გასაგებს ხდის.

IGN-ის თარგმანის მიხედვით, Capcom-ის მიზანია, RE Engine ნელა და ეტაპობრივად „AI თაობის თამაშის ძრავად“ აქციოს და იმ მომავლისკენ იმოძრაოს, „სადაც თამაშებს AI-თან ერთად ვქმნით“.

სად ივლებს Capcom ხაზს

Capcom მკაფიოდ არჩევს ერთმანეთისგან AI-ის გამოყენებას თამაშების შექმნის პროცესში და ტექნოლოგიის თავად თამაშებში დანერგვას. 2026 წლის მარტის აქციონერთა შეხვედრაზე კომპანიამ განაცხადა: „AI-ის მიერ გენერირებულ აქტივებს ჩვენს თამაშებში არ ჩავდებთ. თუმცა ვგეგმავთ მის აქტიურ გამოყენებას დამხმარე ტექნოლოგიად, რათა გავზარდოთ თამაშების შექმნის პროცესის ეფექტიანობა და პროდუქტიულობა. ამ მიზნით ახლა ვეძებთ გზებს მისი სხვადასხვა სფეროში დანერგვისთვის, მათ შორის გრაფიკაში, ხმასა და პროგრამირებაში“.

იშიდას მოხსენება ამ პოზიციას ემთხვევა, თუმცა, როგორც The Verge აღნიშნავს, უფრო ფართო გამოყენების კარს ღიად ტოვებს. IGN-ის შეფასებითაც, მიზანი ცალკეული პროცესების დაჩქარება და გამარტივებაა და არა აქტივების ან ნახატების მთლიანად გენერირება. ამას ერთი ირონიული დეტალიც ემატება: Capcom-ის მომავალი თამაში Pragmata სწორედ AI-ის საშიშროებებზეა აგებული, სტუდია კი ტექნოლოგიას თამაშების შექმნის პროცესში უფრო ღრმად ნერგავს.