Anthropic-მა Claude Code-ს Mods დაამატა, დეველოპერებს ასისტენტის ქცევისა და ინტერფეისის შეცვლა შეუძლიათ

Anthropic-მა Claude Code-ს Mods სისტემა დაამატა, რომლითაც დეველოპერებს კოდის AI ასისტენტის გარეგნობისა და ქცევის შეცვლა შეუძლიათ. Mods JavaScript-ისა და TypeScript-ის ფუნქციებია, რომლებიც Claude Code-ის შიგნით მოვლენებზე რეაგირებენ: ხელსაწყოს გამოძახებებზე, მომხმარებლის მოთხოვნებსა და ინტერფეისის რენდერინგზე. სისტემა ნაგულისხმევად ჩართულია Claude Code-ის 2.1.287 ვერსიიდან და მუშაობს ბრძანების ხაზში, დესკტოპ აპლიკაციასა და ნაწილობრივ VS Code-ის გაფართოებაში.

მანამდე Claude Code-ის მორგება პარამეტრებით, CLAUDE.md-ის ინსტრუქციებითა და hook-ებით შეიძლებოდა, მაგრამ ამ მექანიზმებს თავად ინსტრუმენტის ფუნქციების ან ინტერფეისის შეცვლა არ შეეძლოთ. Mods-ს კი შეუძლია მოთხოვნის გადაწერა მოდელამდე მისვლამდე, ხელსაწყოს გამოძახების დაბლოკვა ან შეცვლა, ნებართვის მოთხოვნების დამუშავება და ინტერფეისის ნაწილების ჩანაცვლება. Anthropic-ის თქმით, ზოგიერთი ჩაშენებული ფუნქცია, მათ შორის /diff და AGENTS.md-ის მხარდაჭერა, უკვე Mods-ის სახითაა დანერგილი.

რას ქმნიან დეველოპერები

Anthropic-ის ტექნიკურ ბლოგპოსტში კომპანიის თანამშრომელმა Addy Osmani-მ დაახლოებით 80-სტრიქონიანი Mod, სახელად Token Weather, წარმოადგინა. ის თვალს ადევნებს, თუ როგორ ივსება Claude-ის კონტექსტური ფანჯარა, და შედეგს მოთხოვნის ზემოთ ზოლში აჩვენებს: 200 000 ტოკენიანი ფანჯრის 18%-ით შევსებისას ინდიკატორზე „Clear“ ჩანს, 67%-ზე „Showers“, 81%-ზე კი „Storm“. გამოცხადებიდან რამდენიმე საათში ერთმა დეველოპერმა უკვე ააწყო Mod, რომელიც Claude-ს საიდუმლო მონაცემებს საუბრის ისტორიაში დატოვების გარეშე გადასცემს.

პირველი ოფიციალური Mod დანამატი „You Should Know“ ცალკე აგენტს რთავს: ის Claude-ის პასუხებს აკვირდება და „Heads up“ შეტყობინებას აგზავნის, როცა შეამჩნევს მნიშვნელოვან ინფორმაციას, რომელიც მომხმარებელს შეიძლება გამორჩეს. მისი ჩართვა ბრძანებით /plugin enable cc-plugin-you-should-know@builtin შეიძლება. Claude Code-ის შემქმნელმა Boris Cherny-მ X-ზე აღნიშნა: „ყველა ადამიანი სხვადასხვაგვარად მუშაობს, ამიტომ არავითარი მიზეზი არ არსებობს, რომ ყველას Claude-თან ერთნაირი გამოცდილება ჰქონდეს“.

უსაფრთხოების საკითხი

Mods დანამატების სახით ვრცელდება და მომხმარებლის ნებართვებით, სენდბოქსის გარეშე მუშაობს, ამიტომ მათი კოდი დეველოპერის კომპიუტერზე ლოკალურად სრულდება. Anthropic მომხმარებლებს ურჩევს, წყარო წინასწარ შეამოწმონ და დანამატები მხოლოდ სანდო ავტორებისგან დააყენონ. ორგანიზაციებს შეუძლიათ გააკონტროლონ, რომელი Mods ჩაიტვირთოს: Team და Enterprise მომხმარებლებისთვის Anthropic-ის sec-default დაცვა მომხმარებლის მიერ დაყენებულ Mods-ზე ადრე იტვირთება და ნაგულისხმევად ხელს უშლის ნებართვების აკრძალვის წესების გადაწერას. დაცვის გარეშე კი Mods-ს ზოგიერთი ნებართვის გადაწყვეტილების შეცვლა მაინც შეუძლია.

Mods-ის იდეა Anthropic-მა პირველად 3 სექტემბერს, GitHub-ზე, „function hooks“-ის სახელით გააჟღერა. ექვს დღეში კომპანიამ განაცხადა, რომ ფუნქციას „Claude Mods“-ის სახელით გამოუშვებდა. სისტემა უკვე ხელმისაწვდომია, გაზიარება კი მარკეტპლეისებიდან, მათ შორის GitHub-დან, შეიძლება.

წყაროები: The Decoder · The New Stack