Claude-მ CRISPR-ის მსგავსი გამეორებებით უცნობი ფერმენტული სისტემა აღმოაჩინა

Anthropic-მა ლაბორატორიის პირველი შედეგები გამოაქვეყნა

Anthropic-მა ახალი ბიოლოგიური კვლევითი ჯგუფის ადრეული შედეგები გამოაქვეყნა. მეცნიერებისგან მხოლოდ ზოგადი მითითების მიღების შემდეგ Claude-მ ბაქტერიების მაინფიცირებელ ვირუსებში, ბაქტერიოფაგებში, აქამდე აღუწერელი ფერმენტული სისტემა იპოვა, მისი აღნაგობა კი იმ DNA-გამეორებებს ჰგავს, რომლებზეც CRISPR არის აგებული. კომპანიამ ჯგუფი 2026 წლის გაზაფხულზე შექმნა, რომ გაერკვია, შეუძლიათ თუ არა ზოგადი დანიშნულების AI მოდელებს ბიოლოგიური აღმოჩენების სისტემატიზაცია და დაჩქარება.

სისტემას array-associated reverse transcriptases, ანუ ART უწოდეს. იგი რევერსულ ტრანსკრიპტაზაზეა დაფუძნებული — ფერმენტზე, რომელიც RNA-ს DNA-ში გადაწერს. ეს ფერმენტი გიგანტურ ბაქტერიოფაგში წინა კვლევებშიც იყო აღწერილი, თუმცა, Anthropic-ის თქმით, სწორედ Claude-მ შენიშნა პირველად სისტემის განმსაზღვრელი ნიშნები: არაკოდირებადი DNA-ის მასივი და დამატებითი ცილა უცნობი ფუნქციით.

950 აგენტი, 21 საათი, 210 მილიონი ტოკენი

Anthropic-ის მონაწილეობა საწყის მითითებასა და ლაბორატორიულ სამუშაოს შემოიფარგლა. Claude-ის აგენტებმა DNA-ის მიმდევრობების დიდი ბაზა გადახედეს, 200 000-ზე მეტი რევერსული ტრანსკრიპტაზა შეაგროვეს, 3 500 ახალი კანდიდატი სისტემა გამოავლინეს და 20 ყველაზე საინტერესოზე ადამიანისთვის წასაკითხი ანგარიში მოამზადეს. კომპანიის თქმით, ასეთ ანალიზს გამოცდილი მეცნიერი კვირები ან თვეები ხარჯავს.

ერთ-ერთმა აგენტმა უჩვეულო რევერსული ტრანსკრიპტაზის გენის გვერდით ტანდემური გამეორებათა მასივი შენიშნა. მან გამეორებები დათვალა, მათ შორის მანძილი გაზომა, განლაგება ცნობილ სისტემებს შეადარა და ლიტერატურაში ძველი ხსენებები მოძებნა. დაახლოებით 950 აგენტის 21-საათიანი ძიების შემდეგ, რომელმაც 210 მილიონი ტოკენი მოიხმარა, კანდიდატი ლაბორატორიაში ახალ ბიოლოგიურ სისტემად დადასტურდა.

ART-ის ფუნქცია ჯერ უცნობია

ART სამი ნაწილისგან შედგება: რევერსული ტრანსკრიპტაზა, მის გვერდით მდგარი პარტნიორი გენი და თანაბრად დაშორებული გამეორებების გრძელი მასივი, რომლის განლაგებაც CRISPR-ის მასივს ჰგავს. ასეთი ნიშნები ერთად მხოლოდ რამდენიმე სისტემაშია ნაპოვნი და ყველა მათგანი პროგრამირებადია — ასრულებს ოპერაციებს, როგორიცაა DNA-ის გაჭრა, კოპირება და ჩასმა; CRISPR მათგან ყველაზე ცნობილია. პირველი ექსპერიმენტებით, ART-ის მასივი მოკლე RNA-ების ერთობლიობად გამოიხატება, სისტემის ფუნქცია კი ჯერ დაუდგენელია. კვლევა გრძელდება და Anthropic-მა pre-print-იც გამოაქვეყნა.

CRISPR-ის გენომური რედაქტირების ერთ-ერთი პიონერი და MIT-ისა და Broad Institute-ის პროფესორი Feng Zhang pre-print-ს გაეცნო: „ეს შთამბეჭდავი მაგალითია იმისა, თუ როგორ შეუძლიათ AI აგენტებს ბიოლოგიურ აღმოჩენებში მონაწილეობის მიღება. რევერსულ ტრანსკრიპტაზებთან დაკავშირებული RNA-გამეორებათა მასივების იდენტიფიცირება მართლაც საინტერესოა და დამატებით კვლევას იმსახურებს“.