საქართველოს AI ნაკრებმა ასტანაში გამართულ IOAI 2026-ზე 7 მედალი მოიპოვა

საქართველოს ეროვნულმა AI ნაკრებმა ყაზახეთის დედაქალაქ ასტანაში გამართულ ხელოვნური ინტელექტის მესამე საერთაშორისო ოლიმპიადაზე (IOAI 2026) 7 მედალი მოიპოვა — 2 ოქრო, 3 ვერცხლი და 2 ბრინჯაო. ნაკრებმა ასევე ერთი საპატიო სიგელი მიიღო და გუნდურ ჩათვლაში 109 ქვეყანას შორის მეშვიდე ადგილი დაიკავა.

ოქროს მედლები ნიკოლოზ გეგენავამ და გიორგი მაისურაძემ მოიპოვეს. ვერცხლი აიღეს ნიკოლოზ ყიფშიძემ, ანტონ ინგოროყვამ და მათე რეხვიაშვილმა, ბრინჯაო კი ლუკა ბერიკელაშვილმა და ნიკოლოზ კილაძემ. საპატიო სიგელი გიორგი ცქიტიშვილს გადაეცა.

მედალოსნებიდან ერთადერთი, ვინც 136-ე საჯარო სკოლაში სწავლობს, ნიკოლოზ ყიფშიძეა. დანარჩენები ვ. კომაროვის თბილისის ფიზიკა-მათემატიკის N199 საჯარო სკოლის მოსწავლეები არიან.

მომზადება და მწვრთნელები

ოლიმპიადამდე ნაკრებმა რამდენიმე თვე ინტენსიურად იმზადა ბიზნესისა და ტექნოლოგიების უნივერსიტეტის (BTU) ბაზაზე შექმნილ ტექ ოლიმპიადების ჰაბში. მომზადება საქართველოს ხელოვნური ინტელექტის ასოციაციამ (GAIA) TBC-ის მხარდაჭერით ჩაატარა. მონაწილეებმა GAIA-ს სპეციალური საოლიმპიადო პროგრამის ფარგლებში ხელოვნური ინტელექტის, მანქანური სწავლებისა და მონაცემთა მეცნიერების პრაქტიკული მიმართულებები შეისწავლეს.

ნაკრებს მთავარი მწვრთნელი შოთა ელყანიშვილი წვრთნიდა, თანახელმძღვანელები კი ლუკა დარსალია და ნიკა მიქაბერიძე იყვნენ.

რა არის IOAI

IOAI მსოფლიოს ერთ-ერთი ყველაზე პრესტიჟული სასკოლო ტექნოლოგიური შეჯიბრებაა და 100-ზე მეტი ქვეყნის საუკეთესო ახალგაზრდებს აერთიანებს. ასტანის გამოცემა რიგით მესამე იყო, საქართველომ კი მასში მეორედ მიიღო მონაწილეობა.

განათლების მხარდაჭერა

TBC-ისთვის განათლებისა და ტექნოლოგიური ეკოსისტემის განვითარება ერთ-ერთი სტრატეგიული მიმართულებაა. კომპანია აგრძელებს იმ ინიციატივების მხარდაჭერას, რომლებიც ახალგაზრდებს თანამედროვე ტექნოლოგიებზე წვდომას აძლევს და საერთაშორისო ასპარეზისთვის ამზადებს. IOAI 2026-ზე მიღწეული შედეგი კიდევ ერთხელ ადასტურებს, რომ მიზანმიმართული განათლების მხარდაჭერა ქვეყნის მომავალი წარმატების საფუძველია.