საქსტატმა ოფიციალურ სტატისტიკაში AI დანერგა — ვებგვერდზე ახალი ჩატ-ბოტი მუშაობს

საქართველოს სტატისტიკის ეროვნულმა სამსახურმა (საქსტატი) 2026 წლიდან საქმიანობაში ხელოვნური ინტელექტის (AI) ინტენსიური გამოყენება დაიწყო. უწყების ცნობით, ეს ციფრული ტრანსფორმაციის მნიშვნელოვანი ეტაპია და მიზნად ისახავს ოფიციალური სტატისტიკის წარმოების პროცესების სრულყოფას, შიდა სამუშაო პროცესების ეფექტიანობის გაზრდასა და მომხმარებლებისთვის თანამედროვე სერვისების შეთავაზებას.

AI-ის შესაძლებლობები ინტეგრირებულია როგორც მომხმარებელზე ორიენტირებულ ციფრულ სერვისებში, ისე მონაცემთა დამუშავების, ანალიზის, მეთოდოლოგიური უზრუნველყოფისა და IT პროცესებში.

AI ჩატ-ბოტი ოფიციალურ ვებგვერდზე

ერთ-ერთი მთავარი სიახლეა საქსტატის ოფიციალურ ვებგვერდზე ხელოვნურ ინტელექტზე დაფუძნებული ჩატ-ბოტის ამოქმედება, რომელიც საიტზე „საქსტატის ასისტენტის“ სახელით მუშაობს. სერვისი მომხმარებლებს საშუალებას აძლევს მარტივ ენაზე დასვან კითხვები ეკონომიკურ, სოციალურ, დემოგრაფიულ და სხვა მაჩვენებლებზე და მყისიერად მიიღონ პასუხი.

სისტემა ავტომატურად ამუშავებს მომხმარებლის მოთხოვნას, ეძებს შესაბამის მონაცემებს და, საჭიროების შემთხვევაში, შესაბამის სტატისტიკურ პუბლიკაციებსა და მონაცემთა ბაზებზე გადაამისამართებს.

AI შიდა პროცესებსა და IT-ში

ხელოვნური ინტელექტი საქსტატის შიდა საქმიანობასაც ეხმარება: AI-ის მხარდაჭერით მიმდინარეობს მეთოდოლოგიური დოკუმენტაციის განახლება და სრულყოფა, ადმინისტრაციული მონაცემების კლასიფიკაცია და დამუშავება, მონაცემთა ანალიზი, მონაცემთა ბაზების მონიტორინგი და სამუშაო პროცესების ოპტიმიზაცია. უწყების თქმით, ეს მნიშვნელოვნად ზრდის სამუშაოების სისწრაფესა და ხარისხს.

IT მიმართულებით AI გამოიყენება პროგრამული უზრუნველყოფის განვითარებაში, კოდის შექმნასა და ოპტიმიზაციაში, ალგორითმების შემუშავებაში, სისტემების ტესტირებასა და ახალი ციფრული გადაწყვეტილებების დანერგვაში — ეს აჩქარებს განვითარების ციკლს და აუმჯობესებს ხარისხს.

NACE კლასიფიკატორის ახალი საძიებო პორტალი

ხელოვნურ ინტელექტზე დაფუძნებული NACE კლასიფიკატორის ახალი საძიებო პორტალი საქსტატმა ივლისში წარადგინა. პორტალი მომხმარებელს საშუალებას აძლევს ეკონომიკური საქმიანობის აღწერა ტექსტით ან ხმოვანი ფუნქციით მიაწოდოს და შესაბამისი NACE Rev.2 კოდი სწრაფად მოძებნოს. სერვისი ქართულ და ინგლისურ ენებზეა ხელმისაწვდომი და განკუთვნილია ბიზნესისთვის, საჯარო უწყებების თანამშრომლებისთვის და დაინტერესებული მომხმარებლებისთვის. პორტალი ხელმისაწვდომია მისამართზე nace.geostat.ge/ka.

საქსტატის აღმასრულებელი დირექტორის, გოგიტა თოდრაძის თქმით, AI უკვე მნიშვნელოვანი ინსტრუმენტია ოფიციალური სტატისტიკისთვის. „ჩვენი მიზანია, თანამედროვე ტექნოლოგიების გამოყენებით კიდევ უფრო გავზარდოთ სტატისტიკური პროცესების ეფექტიანობა, გავამარტივოთ მონაცემებზე ხელმისაწვდომობა და მომხმარებლებს შევთავაზოთ სწრაფი, ინოვაციური და მაღალი ხარისხის სერვისები“, — აღნიშნა მან. საქსტატის განცხადებით, AI-ის ეტაპობრივი ინტეგრირება ოფიციალური სტატისტიკის წარმოებისა და გავრცელების სხვადასხვა ეტაპზე მომავალშიც გაგრძელდება, საერთაშორისო პრაქტიკისა და ტექნოლოგიური სტანდარტების გათვალისწინებით.