Toyota ყველაზე გაყიდვადი მოდელის, Corolla-ს, ელექტრო ვერსიას ამზადებს

Toyota ყველა დროის ყველაზე გაყიდვადი ავტომობილის, Corolla-ს, ელექტრო ვერსიას ამზადებს. მოდელი 1966 წლიდან 57 მილიონზე მეტი ასლით გაიყიდა, ამ ხნის განმავლობაში 12 განახლება გადაიტანა, თუმცა მომდევნო თაობა წინამორბედებისგან მკვეთრად განსხვავდება.

ბესტსელერიდან ელექტრომობილამდე

კომპანიამ ახალი Corolla ჯერ კონცეპტის სახით, იაპონიაში გამართულ მობილობის საერთაშორისო შოუზე წარადგინა - სერიულ მოდელამდე თითქმის ერთი წლით ადრე. „როგორ უნდა განვითარდეს Corolla?“ - დარბაზს Toyota-ს აღმასრულებელმა დირექტორმა კოძი სატომ ჰკითხა და ძირფესვიანი განახლება წარადგინა: ახალი დიზაინი, მაღალტექნოლოგიური სალონი და განახლებული პლატფორმა.

მოსალოდნელია, რომ ახალი თაობა დღევანდელი Corolla-ს TNGA-C არქიტექტურას შეინარჩუნებს, თუმცა მნიშვნელოვნად გადამუშავებული სახით - პლატფორმა ყველა ტიპის სისტემას დაუჭერს მხარს, სრულად ელექტრულის ჩათვლით.

რას შესთავაზებს ახალი Corolla

Car and Driver-თან საუბარში ინჟინრებმა აღნიშნეს, რომ ჰიბრიდული ვერსია ახალ 1,5-ლიტრიან ოთხცილინდრიან ძრავს ელექტროძრავთან ერთად მიიღებს, საერთო სიმძლავრით დაახლოებით 134 ცხენის ძალა. სისტემა ამჟამინდელზე 10-20%-ით ეფექტური იქნება, არ არის გამორიცხული ოთხივე თვლის ამძრავიანი ვერსიაც.

პირველად Toyota Corolla-ს plug-in ჰიბრიდულ და სრულად ელექტრულ ვერსიებსაც გამოუშვებს. Plug-in ჰიბრიდს უფრო დიდი ბატარეა და უფრო გრძელი სავალი მანძილი ექნება, ელექტრომობილი კი ერთ- და ორძრავიანი კონფიგურაციებით, მინიმუმ 250 მილი (დაახლოებით 400 კილომეტრი) სავალი მანძილით გამოვა. დანარჩენ დეტალებს კომპანია ჯერ არ ასაჯაროებს.

გადარჩენის საკითხი

ივლისში NHK-სთან ინტერვიუში Toyota-ს საბჭოს თავმჯდომარემ და ყოფილმა აღმასრულებელმა დირექტორმა აკიო ტოიოდამ გააფრთხილა, რომ კომპანია იძულებულია შეეგუოს ცვლილებებს, წინააღმდეგ შემთხვევაში „ვერ გადარჩება“ - ჩინეთიდან მომავალი ახალი კონკურენციისა და ტექნოლოგიების ფონზე. გადაცემა მომდევნო თაობის Corolla-ს შემუშავების საიდუმლო ცენტრში ჩაიწერა.

ჯერჯერობით უცნობია, გამოვა თუ არა Corolla EV აშშ-ის ბაზარზე. ახალი მოდელის დებიუტი 2027 წელს, 2028 წლის მოდელის სახით იგეგმება. ფასები ჯერ არ დასახელებულა, თუმცა Car and Driver-ის მოლოდინით, ბენზინის ვერსია დაახლოებით 25 000 დოლარიდან დაიწყება, ჰიბრიდი - 27 000-დან, ელექტრული და plug-in ჰიბრიდული ვერსიები კი 30 000 დოლარის ფარგლებში იქნება.