აშშ-ის სამხედრო ძალები ყალბი დაზვერვის გამო ოპერაციის ზღვარზე იყვნენ — CNN

აშშ-ის სამხედრო ძალები წელს გაზაფხულზე, ირანთან ომის დროს, შეიარაღებული კონფლიქტის ზღვარზე აღმოჩნდა ხელოვნური ინტელექტის დახმარებით მომზადებული დაზვერვის ანგარიშის გამო. CNN-ის 18 სექტემბრის პუბლიკაციის მიხედვით, ანგარიშში ნათქვამი იყო, რომ ახლო აღმოსავლეთში ჩინური გემი ბირთვული იარაღის პროგრამის კომპონენტებს გადაჰქონდა, რაც წყაროების თქმით სრული სიცრუე იყო.

ოთხი წყაროს თანახმად, ამერიკის სამხედრო ძალებმა გემის შეჩერებისთვის მზადება დაიწყეს, ორი მათგანის თქმით კი შეიარაღებული სამხედროები ხომალდზე ასვლას აპირებდნენ, საჰაერო ძალების თვითმფრინავები კი ჰაერში იყვნენ. ოპერაციამდე ცოტა ხნით ადრე ოფიციალურმა პირებმა ანგარიში უფრო ღრმად შეამოწმეს და გაარკვიეს, რომ ის სპეციალური ოპერაციების სარდლობის ანალიტიკოსს ხელოვნური ინტელექტის დახმარებით ჰქონდა მომზადებული, ხოლო ჩატბოტმა გემის ტვირთი არასწორად განსაზღვრა. რა კონკრეტული ტვირთი აღმოჩნდა არასწორად დასახელებული, CNN-მა ვერ გაარკვია.

„მთლიანად ყალბი“ — ასე აღწერა ანგარიში ერთმა წყარომ და დასძინა, რომ მან „თითქმის ომი დაიწყო“.

სად ჩაერთო ხელოვნური ინტელექტი

CNN-ის ცნობით, ანალიტიკოსმა ჩატბოტს ჰავაიში განლაგებული აშშ-ის სპეციალური ოპერაციების სარდლობის ინფორმაცია გემის მანიფესტის შესახებ ჰკითხა. გაურკვეველია, კომერციული თუ სამთავრობო პროდუქტი იყო ჩატბოტი. მან ღია წყაროების ინფორმაცია საიდუმლო სიგნალურ დაზვერვასთან შეაერთა და ტვირთზე საბედისწერო დასკვნამდე მივიდა. შემდეგ ანალიტიკოსმა ხელოვნური ინტელექტი კიდევ ერთხელ გამოიყენა, რომ შედეგები სტანდარტული დაზვერვის ანგარიშის ფორმატში ჩაესხა და გაავრცელა.

„შიდა ხელსაწყოები უმეტესად კომერციული პროდუქტების ასლებია, მხოლოდ პომადით“, — ამბობს სამხედრო AI სისტემების მცოდნე ყოფილი მაღალი რანგის ამერიკელი ოფიციალური პირი. აშშ-ის სპეციალური ოპერაციების სარდლობამ და პენტაგონმა კომენტარი არ გააკეთეს.

სტანდარტების ნაკლებობა

ხელოვნური ინტელექტის სწრაფი დანერგვის არგუმენტი ისაა, რომ ის ეხმარება სამხედროებს უფრო სწრაფად გადაწყვიტონ, რომელი სამიზნეები დაარტყან ან სად გადააადგილონ ძალები. იანვარში თავდაცვის მდივანმა პიტ ჰეგსეთმა ხელოვნური ინტელექტის დაჩქარების სტრატეგია გამოაქვეყნა, რომლის მიხედვითაც AI უნდა გახდეს ხელმისაწვდომი სამი მილიონი სამოქალაქო და სამხედრო მოსამსახურისთვის, ყველა დონეზე.

თუმცა, რამდენიმე ოფიციალური პირის თქმით, პროცესი დეცენტრალიზებულია: უწყებები სხვადასხვა ხელსაწყოს სხვადასხვა ბრძანებითა და უსაფრთხოების სტანდარტებით იყენებენ და არ არსებობს ერთიანი წესი იმაზე, თუ როგორ მოწმდება მათ მიერ გენერირებული ინფორმაცია.

წყაროები ამბობენ, რომ მსგავსი „ჰალუცინაცია“ სადაზვერვო სამსახურებში იზოლირებული შემთხვევა არ ყოფილა მას შემდეგ, რაც ეს ხელსაწყოები მთავრობაში გავრცელდა. ზოგიერთი უფროსი ოფიციალური პირის თქმით, AI-მ ანალიტიკოსებზე ზეწოლა გაზარდა დაზვერვის უფრო სწრაფად წარმოებისკენ, რაც შეცდომებისთვის კარს აღებს, ახალგაზრდა ანალიტიკოსები კი ამ ხელსაწყოებს უკრიტიკოდ ენდობიან. „AI საშუალებას გაძლევს, ცუდ იდეამდე უფრო სწრაფად მიხვიდე“, — ამბობს ერთი წყარო. მეორე წყაროს თქმით, სამიზნეების არჩევაში AI-ის გამოყენება იზრდება და არ არსებობს რეალური სახელმძღვანელო, თუ როგორ შეაჩერებს ადამიანის ჩართულობა სამოქალაქო მსხვერპლს.