VS Code-ի կլորացված անկյունները դժգոհություն են առաջացրել. Microsoft-ը վերափոխում է խմբագրիչը

Սեպտեմբերի 25-ին GitHub-ում հրապարակված սխալի հաշվետվությունը դարձավ VS Code-ի վերափոխման ամենաքննարկվող արձագանքներից մեկը։ kidCaulfield կեղծանունով օգտատերը այն վերնագրել է «Bug: Border radius has infected editor» և նկարագրել, թե ինչպես կլորացված անկյունները տարածվեցին խմբագրիչի միջերեսով։ Մինչ Microsoft-ը հաշվետվությունը կփակեր որպես կրկնօրինակ, այն հավաքել էր տասնյակ արձագանքներ և ակտիվ քննարկում Hacker News-ում։

Ինչ է ասվում հաշվետվությունում

Հեղինակն օգտագործում էր VS Code 1.139.0 տարբերակը՝ բոլոր ընդլայնումներն անջատված, և խնդրի վերարտադրման երկու քայլ նշեց. բացել խմբագրիչը, և այն արդեն «վարակված է կլորացված անկյուններով»։ Անկյունները երևում են տեքստային խմբագրիչում, ֆայլերի ուսումնասիրիչում, տերմինալում և Copilot Chat-ում։ Օգտատիրոջ խոսքով՝ կլորացումներն այնքան աչքի են ընկնում, որ խանգարում են արդյունավետ աշխատանքին։ Երբ բոտը խորհուրդ տվեց թարմացնել մինչև 1.139.1, նա պատասխանեց, որ խնդիրը մնում է, և որ հնարավոր է անցնի այլ խմբագրիչի։

Արձագանքներ, կրկնօրինակ և մեկ բառ

Քննարկումը տեխնիկական վեճի չվերածվեց. մասնակիցները մատնանշեցին #334285-ը, հաշվետվությունը փակվեց որպես կրկնօրինակ, ստացավ *duplicate պիտակը և հանձնվեց VS Code-ի թիմի անդամին։ Hacker News-ում թեման հավաքեց 79 միավոր և 51 մեկնաբանություն, իսկ GitHub-ում հաշվետվությունն ուներ 62 արձագանք. 42 հավանություն, 16 ծիծաղի էմոջի, երեք ժխտում և մեկ «աչքեր»։ Ամենամեջբերված մեկնաբանությունը մեկ այլ օգտատիրոջից էր՝ «Ո՞վ մտածեց, որ սա լավ գաղափար է։ Էսթետիկորեն ուշադրություն է շեղում», իսկ պատասխանը՝ մեկ բառ՝ «Copilot»։

Վերափոխումը, որը բերեց անկյունները

Կրկնօրինակի նպատակակետը՝ «Evolving the VS Code Interface» թեման, բացվել է սեպտեմբերի 3-ին և մինչ օրս modern UI-ի պաշտոնական ամփոփումն է։ Այնտեղ նշված է, որ վերափոխումը բերել է աշխատանքային տարածքի հատվածների ավելի հստակ բաժանում, նորացված տիպոգրաֆիա, ավելի պարզ վիզուալ հիերարխիա , իսկ բացատները, անկյունների շառավիղները, գույներն ու ստվերները միավորվել են մեկ համակարգում։ Նույն թեմայում հավաքվել է նաև քննադատությունը. օգտատերերի խոսքով՝ միջերեսը չափից շատ էկրանի տարածք է զբաղեցնում։ 1920x1080 էկրանին 100% խոշորացմամբ Microsoft-ը չափել է մոտ 20 պիքսել ավել հորիզոնական և 12-18 պիքսել ավել ուղղահայաց տարածք։ Արձագանքների հաշվեկշիռը միանշանակ է՝ 56 ժխտում՝ 18 հավանության դեմ։

Ինչ փոխվեց և ինչպես վերադառնալ

Ի պատասխան՝ թիմը պարզեցրել է տիպոգրաֆիայի սանդղակը, հանել մեծատառ պիտակները, ճշգրտել բացատները, անկյունների շառավիղներն ու գույները և ավելացրել կարգավորումներ, այդ թվում՝ workbench.activityBar.compact և workbench.editor.tabActionReserveSpace։ Ավելի խիտ «Compact Mode»-ը միանում է window.density.layout-ը compact դարձնելով։ Ով ուզում է հին տեսքը, կարող է անջատել workbench.experimental.modernUI-ը և վերադառնալ Classic UI-ին, սակայն դա ժամանակավոր է. Microsoft-ը նախատեսում է բոլորին տեղափոխել նոր միջերես և հեռացնել դասականը։ Ամսաթիվ չի նշվել։