Toyota-ն պատրաստում է Corolla-ի էլեկտրական տարբերակը՝ պատմության ամենավաճառվող մեքենայի

Toyota-ն պատրաստվում է ներկայացնել իր պատմության ամենավաճառվող մեքենայի՝ Corolla-ի էլեկտրական տարբերակը։ 1966 թվականից ի վեր աշխարհում վաճառվել է այս մոդելի ավելի քան 57 միլիոն օրինակ, և նոր սերունդը բոլորովին այլ տեսք կունենա, քան նախորդները։

Ամենավաճառվողից՝ էլեկտրամեքենա

Toyota-ն նոր Corolla-ի առաջին կոնցեպտը ցուցադրել է Japan Mobility Show-ում՝ սերիական մոդելի սպասվող թողարկումից գրեթե մեկ տարի առաջ։ Toyota-ի գլխավոր տնօրեն Կոձի Սատոն դահլիճին հարցրեց՝ «Ինչպե՞ս պետք է զարգանա Corolla-ն», և ներկայացրեց արմատական թարմացում՝ նոր դիզայն, բարձր տեխնոլոգիական սրահ և արդիականացված հարթակ։

Սպասվում է, որ նոր սերունդը կպահպանի ներկայիս Corolla-ի TNGA-C ճարտարապետությունը, բայց զգալիորեն վերամշակված տարբերակով, որը կաջակցի բոլոր տեսակի ուժային համակարգերին՝ լիովին էլեկտրականից մինչև լիցքավորվող հիբրիդ, սովորական հիբրիդ և ներքին այրման շարժիչ։

Ինչ կառաջարկի նոր Corolla-ն

Car and Driver-ին տված զրույցում ինժեներները նշել են, որ հիբրիդային տարբերակը կստանա նոր 1,5-լիտրանոց քառագլան շարժիչ՝ էլեկտրական շարժիչի հետ միասին, ընդհանուր մոտ 134 ձիաուժ հզորությամբ։ Համակարգը ներկայիսից մոտ 10–20%-ով ավելի արդյունավետ կլինի, և հնարավոր է նաև բոլոր անիվների քարշակով տարբերակ։

Առաջին անգամ Toyota-ն կավելացնի նաև լիցքավորվող հիբրիդային և լիովին էլեկտրական Corolla։ PHEV-ը կունենա ավելի մեծ մարտկոց և ավելի երկար էլեկտրական ընթացք, իսկ էլեկտրամեքենան կթողարկվի մեկ և երկու շարժիչով տարբերակներով՝ առնվազն 250 մղոն (մոտ 400 կիլոմետր) ընթացքով։ Մնացած բնութագրերը դեռ չեն հրապարակվել։

Գոյատևման հարց

Հուլիսին NHK-ին տված հարցազրույցում Toyota-ի տնօրենների խորհրդի նախագահ և նախկին գլխավոր տնօրեն Ակիո Տոյոդան զգուշացրել է, որ ընկերությունը ստիպված է հարմարվել, այլապես «չի կարող գոյատևել» Չինաստանից եկող նոր մրցակցության և տեխնոլոգիաների պայմաններում։ Հաղորդումը նկարահանվել է նոր սերնդի Corolla-ի «խիստ գաղտնի» մշակման կենտրոնում։

Դեռ պարզ չէ՝ արդյոք Corolla EV-ն կհայտնվի ԱՄՆ-ի շուկայում։ Նոր մոդելի դեբյուտը սպասվում է 2027 թվականին՝ որպես 2028 թվականի մոդել։ Գները դեռ հայտնի չեն, սակայն Car and Driver-ի կանխատեսմամբ՝ բենզինային տարբերակը կսկսվի մոտ 25 000 դոլարից, հիբրիդը՝ 27 000-ից, իսկ էլեկտրականն ու լիցքավորվող հիբրիդը կլինեն 30 000 դոլարի սահմաններում։