500 Global in Eurasia-ს მე-11 ნაკადმა აქსელერაცია დაიწყო — პროგრამაში 11 სტარტაპი მონაწილეობს

Bank of Georgia-ს მხარდაჭერით, 500 Global in Eurasia-ს აქსელერაციის პროგრამის მე-11 ნაკადმა მუშაობა დაიწყო. პროგრამა 12 კვირას გრძელდება და საქართველოს ინოვაციებისა და ტექნოლოგიების სააგენტოს (GITA) და 500 Global-ის პარტნიორობით ხორციელდება. მიზანია საქართველოში ტექნოლოგიური სტარტაპების განვითარება, საერთაშორისო გამოცდილებით გაძლიერება და გლობალურ ბაზრებზე გასვლის ხელშეწყობა.

მე-11 ნაკადის მონაწილეები

აქსელერაციაში 11 სტარტაპი მონაწილეობს: Azta, Joberos, MediMind, moonlight, Pugi, Sparrow Analytics, Subsig, Synqmonkeys, TaskRoom, Naoma AI Inc. და Yena.

პროგრამა ადრეული ეტაპის ტექნოლოგიურ სტარტაპებს პრაქტიკაზე დაფუძნებული ცოდნის მიღების, ბიზნესმოდელების დახვეწის, ზრდის სტრატეგიების მომზადებისა და საერთაშორისო მასშტაბებზე გასვლის შესაძლებლობას აძლევს.

რას მოიცავს პროგრამა

ინტენსიური პროგრამა მოიცავს სასწავლო მოდულებს, საერთაშორისო გამოცდილების მქონე ექსპერტებთან ინდივიდუალურ მენტორინგს და მხარდაჭერას იმ გამოწვევების გადაჭრაში, რომლებიც სტარტაპების განვითარების ადრეულ ეტაპზე ჩნდება.

ოფიციალური ინფორმაციით, 500 Global-ის მე-11 ნაკადი 21 სექტემბრიდან 11 დეკემბრამდე გრძელდება. პროგრამა სამ ეტაპად იყოფა: პირველი პირისპირ ეტაპი 21 სექტემბრიდან 2 ოქტომბრამდე მიმდინარეობს, მეორე ეტაპი დისტანციურად, 5 ოქტომბრიდან 27 ნოემბრამდე ტარდება, დასკვნითი პირისპირ ეტაპი კი 30 ნოემბრიდან 11 დეკემბრამდე თბილისში გაიმართება. დემო დღე 10 დეკემბერს არის დაგეგმილი.

აქსელერატორის ცნობით, პროგრამაში მიღებულ კომპანიებს 100 000 დოლარის ინვესტიცია სთავაზობენ — საბოლოო პირობებისა და შემოწმების შედეგების მიხედვით.

შედეგები და დემო დღე

საქართველოში ინიციატივა 2022 წლიდან, Bank of Georgia-ს, GITA-სა და 500 Global-ის პარტნიორობის ფარგლებში ხორციელდება. ამ პერიოდში პროგრამა 100-ზე მეტმა დამფუძნებელმა და სტარტაპის წარმომადგენელმა გაიარა, ის კი საქართველოში ტექნოლოგიური მეწარმეობის განვითარების ერთ-ერთ მნიშვნელოვან პლატფორმად ჩამოყალიბდა.

„მოხარული ვართ, რომ Bank of Georgia-ს მხარდაჭერით 500 Global in Eurasia-ს აქსელერაციის პროგრამის მე-11 ნაკადს ინტენსიური გადამზადების გავლის შესაძლებლობა აქვს. პროგრამის მონაწილეები კვალიფიციურ მენტორებთან და ინვესტორებთან მუშაობენ, იღებენ პრაქტიკულ ცოდნას ბიზნესის განვითარებისა და მასშტაბირების მიმართულებით, ემზადებიან ინვესტიციების მოსაზიდად და ამყარებენ კავშირებს საერთაშორისო სტარტაპ ეკოსისტემის წარმომადგენლებთან. გვიხარია, რომ სტარტაპებისთვის შესაძლებლობებს ვქმნით და ხელს ვუწყობთ, რომ იდეები კონკურენტუნარიან პროდუქტებად აქციონ და საერთაშორისო ბაზრებისთვის მოამზადონ“, — აცხადებენ Bank of Georgia-ში.

აქსელერაციის დასკვნით ეტაპზე ტრადიციულად დემო დღე იმართება. მონაწილეები საკუთარ პროდუქტებს, ბიზნესის განვითარების დინამიკასა და მიღწეულ პროგრესს ინვესტორებს, კორპორაციული სექტორის წარმომადგენლებსა და ინდუსტრიის ექსპერტებს წარუდგენენ. დემო დღე სტარტაპებს პროფესიული ქსელის გაფართოების, ახალი ბიზნესკავშირების დამყარებისა და პოტენციურ პარტნიორებთან და ინვესტორებთან იდეების გაცნობის შესაძლებლობას აძლევს.