Reuters: McDonald's მენიუს ფასებს AI-ით დინამიურად ადგენს

McDonald's აშშ-სა და კიდევ რამდენიმე ბაზარზე მენიუს ფასებს ხელოვნური ინტელექტის საშუალებით დინამიურად ადგენს. ამის შესახებ Reuters-ის გამოძიება იუწყება. სისტემა ეძებს „ოპტიმალურ ფასს“, რომელიც რესტორნის მომხმარებლების გადახდის მზადყოფნას შეესაბამება, ამიტომ ფასი ლოკაციის მიხედვით იცვლება. Reuters-ის თანახმად, ერთ ქალაქში ორ რესტორანს იგივე პროდუქტზე სხვადასხვა ფასი შეიძლება ჰქონდეს.

ფასებში სხვაობა ფრესნოში

Reuters-მა ნახა ინტერფეისი, რომლითაც ფრანშიზონები ამ ტექნოლოგიას იყენებენ. სისტემა ატყობინებს, რომ „თქვენი რესტორანი ფასის მიმართ საშუალო მგრძნობელობას აჩვენებს“ და ამას „თქვენს რაიონში მომხმარებლების მზადყოფნასთან გადახდაზე“ უკავშირებს. კალიფორნიის ქალაქ ფრესნოში ერთ რესტორანში Big Mac $5,69 ღირს, ორ მილიოში მდებარე მეორეში კი $6,89, ანუ 21% მეტი.

ფრანშიზონები ზეწოლაზე საუბრობენ

McDonald's-ის განცხადებით, ფრანშიზონებს ფასების დამოუკიდებლად დაწესების უფლება აქვთ. რამდენიმე მფლობელმა Reuters-ს უთხრა, რომ კომპანია მათზე ზეწოლას ახდენს AI-ის ინსტრუმენტების გამოსაყენებლად: კორპორატიული დოკუმენტით, McDonald's აკვირდება, რამდენად მიჰყვებიან ოპერატორები პლატფორმას, და აფიქსირებს ალგორითმის რეკომენდაციიდან გადახრებს. რეკომენდაციები ფრანშიზონებს წელიწადში სამჯერ მაინც ეგზავნებათ, ახალი ბიზნესსტანდარტები კი „McDonald's-ის მიერ დამტკიცებულ ფასების კონსულტანტთან და ინსტრუმენტებთან კონსტრუქციულ თანამშრომლობას“ მოითხოვს.

მფლობელების თქმით, რეკომენდაციიდან გადახრის შემდეგ კორპორაციიდან რეკავენ. „არჩევანი პრაქტიკულად აღარ გაქვს“, თქვა რესტორნის ყოფილმა მფლობელმა Karen King-მა. ლიცენზიის განახლება და ახალი ფილიალის გახსნა სწორედ კორპორაციაზეა დამოკიდებული. კომპანიის CEO Chris Kempczinski-მ ინვესტორებს განუცხადა, რომ „ფასების წესების დარღვევა ზოგ შემთხვევაში ამ საუბრების ნაწილია“.

ანტიტრასტული რისკი და უარყოფა

ფასების პორტალის მომსახურების პირობები მფლობელებს აფრთხილებს, რომ ისინი „ერთმანეთის კონკურენტები შეიძლება იყვნენ“ და ანტიტრასტული და კონკურენციის კანონები უნდა დაიცვან. დოკუმენტი იმეორებს, რომ ფრანშიზონები „საბოლოო ფასს ყოველთვის თავად განსაზღვრავენ“. FCC-ის ყოფილმა კომისარმა William Kovacic-მა Reuters-ს უთხრა, რომ ეს ფორმულირება „პოტენციური პრობლემის აღიარებაა“. McDonald's-მა Reuters-ის მასალა „სპეკულაციური და არაინფორმირებული“ უწოდა და აღნიშნა, რომ პორტალი „ინსტრუმენტია და არა მანდატი“.

Reuters-ის ცნობით, ტექნოლოგიის რაღაც ვერსია კომპანიას 2019 წლიდან მაინც აქვს. კონეტიკუტში პლატფორმამ ერთი Big Mac-ისთვის $18-ის ფასი შესთავაზა, რაც ვირუსულად გავრცელდა და სარჩელით დასრულდა; საქმე ჯერ მიმდინარეობს. მსგავსი გეგმის გამო კრიტიკა 2024 წელს Wendy's-მაც დაიმსახურა.