Արևային էներգիան ԱՄՆ-ում առաջին անգամ գերազանցեց ածուխին

Մայիսին առաջին անգամ ԱՄՆ-ում արևային էներգիան ավելի շատ էլեկտրաէներգիա արտադրեց, քան ածուխը։ Համաշխարհային էներգետիկ վերլուծական Ember կենտրոնի հրապարակած տվյալների համաձայն՝ արևի մասնաբաժինը արտադրության մեջ կազմել է 12.8%, իսկ ածուխինը՝ 12.2%։ Տեղեկությունը տարածել է Associated Press գործակալությունը։

Նշանակալի շրջադարձ էներգետիկ հաշվեկշռում

Ածուխի 12.2%-ը ամսական կտրվածքով գրանցված չորրորդ ամենացածր ցուցանիշն է։ Ember-ի էներգետիկայի և տվյալների ավագ վերլուծաբան Նիկոլա Ֆուլգումի խոսքով՝ մայիսին արևային էներգիան դարձել է նաև երկրի երրորդ խոշորագույն էլեկտրաէներգիայի աղբյուրը՝ բնական գազից և միջուկային էներգիայից հետո։ Ածխի արտադրությունը ապրիլին հասել է պատմական ամսական նվազագույնին, իսկ մայիսին վերականգնվել է միայն չնչին չափով։

«Տարիներ շարունակ արևային էներգիայի մասնաբաժինը ԱՄՆ էներգետիկ հաշվեկշռում աճում էր, մինչդեռ ածուխը կորցրեց իր կարգավիճակը», — ասել է Ֆուլգումը։ Նա սպասում է, որ դեռ մի քանի ամիս արևը կգերազանցի ածուխին, մինչև մի քանի տարի անց այդ գերազանցումը կդառնա տարեկան։

Աճ՝ չնայած դաշնային քաղաքականությանը

Արևային էներգիան ԱՄՆ-ում արդեն հինգ տարի նոր արտադրական հզորությունների գլխավոր աղբյուրն է՝ ըստ Արևային էներգետիկայի արդյունաբերության ասոցիացիայի (SEIA)։ Վերլուծական Wood Mackenzie ընկերության հետ համատեղ զեկույցում SEIA-ն նշում է, որ առաջին եռամսյակում ավելացված նոր հզորությունների 91%-ը բաժին է ընկել արևային էներգիային և մարտկոցներին։

Այս նվաճումը գրանցվել է այն ֆոնին, երբ գրեթե երկու տասնամյակ կայուն սպառումից հետո ԱՄՆ-ում էլեկտրաէներգիայի պահանջարկը կրկին աճում է՝ արհեստական բանականության համար անհրաժեշտ տվյալների կենտրոնների և տեղական արտադրության հաշվին։ Ֆուլգումի խոսքով՝ տվյալները ցույց են տալիս, որ արևային էներգիան «ունի դիմացկունություն» նաև դաշնային աջակցության նվազման պայմաններում։

Վաշինգտոնը հակառակ ուղղությամբ է գնում

Անցյալ շաբաթ Դոնալդ Թրամփը ներկայացրեց ԱՄՆ ածխի արդյունաբերությանն աջակցելու ծրագիր՝ մոտ 700 միլիոն դոլար ածխով աշխատող էլեկտրակայանների և ածխի արտահանման համար։ Նա ասաց, որ «ածուխը հիանալի բիզնես է» և որ «էներգիայի առումով դրա նմանը չկա»։ Նրա վարչակազմը չեղարկել է արևային և հողմային նախագծեր և դադարեցրել մատչելի արևային նախագծերի համար նախատեսված 7 միլիարդ դոլարի ֆինանսավորումը։

Սպիտակ տան խոսնակ Թեյլոր Ռոջերսի խոսքով՝ վարչակազմի քաղաքականությունը նպատակաուղղված է երկրի անվտանգության ամրապնդմանը, և Թրամփը «փրկել է ամերիկյան ածխի արդյունաբերությունը»՝ կանխելով 17 գիգավատից ավելի հզորությունների շահագործումից դուրս գալը։ Կանադական Heliene արևային պանելների արտադրող ընկերության հիմնադիր և գլխավոր տնօրեն Մարտին Պոխտարուկը հակադարձում է՝ ներդրողները գումարը դնում են այնտեղ, որտեղ եկամտաբերությունն ամենաբարձրն է, իսկ էլեկտրաէներգիայի արտադրությունում դա արևային էներգիան է։